Экскурсіі

Аглядная экскурсія па г. Смаргоні

Прапануем гасцям аглядную экскурсію па горадзе Смаргоні, якая ўключае наведванне гістарычнай часткі горада, касцёла Святога Міхаіла Арханёла (былы кальвінскі збор князёў Зяновічаў), Спаса-Праабражэнскага сабора і іншых цікавых аб'ектаў нашага горада.

Запрашаем усіх пазнаёміцца з гісторыяй слаўнага горада Смаргонь!

Аглядная экскурсія па г. Смаргоні з наведваннем мемарыяльнага комплекса па лініі супрацьстаяння ў Першую сусветную вайну

Прапануем гасцям  наведать гістарычную частку горада Смаргоні, а таксама мемарыяльны комплекс па лініі супрацьстаяння ў Першую сусветную вайну 1915-1917 гг. у г. Смаргоні і гісторыка-культурнага комплекса пад адкрытым небам "Залатая горка".                  

Турыстычны маршрут “Сцежкай вайны”

Удзельнікі маршрута пазнаёмяцца з падзеямі Першай сусветнай вайны на Смаргоншчыне, наведаўшы экспазіцыю Смаргонскага гісторыка-краязнаўчага музея, мемарыяльны комплекс па лініі супрацьстаяння ў Першую сусветную вайну 1915-1917 гг. у г. Смаргоні, гісторыка-культурны комплекс пад адкрытым небам “Залатая горка”.

Экскурсія па экспазіцыі Смаргонскага гісторыка-краязнаўчага музея “Дарогай сустрэч”

Смаргонскі гісторыка-краязнаўчы музей прапануе сваім гасцям прайсці па экспазіцыі "Дарогай сустрэч" і акунуцца ў гістарычнае мінулае м. Крэва і Крэўскага замка XIV - XVI стст. 

Уразяць і экспануемыя прадметы, знойдзеныя падчас раскопак Крэўскага замка: каменныя ядры, кафля і гліняны посуд, фрагменты вырабаў са шкла і металу.

Дарогі кірмашовыя прывядуць гасцей да гісторыі г. Смаргоні – у мінулым уладанні князёў Зяновічаў, магнатаў Радзівілаў і граф'ёў Пшаздзецкіх.

Шумна і людна было на Смаргонскім кірмашы: скамарохі, мядзведзі, лялечны тэатр, гаспадыня-абараначніца з традыцыйным смаргонскім абаранкам.

"Мёртвым горадам" паўстане Смаргонь у гады Першай Сусветнай вайны. Тут распавядуць аб цяжкіх буднях салдат, аб выпрабаваннях, якія выпалі на долю бежанцаў Смаргоншчыны, аб жаночым ударным "батальёне смерці" прапаршчыка М. Бачкаровай.

Фотаздымкі і дакументы прадставяць гераізм, бясстрашнасць партызан і падпольшчыкаў. Матэрыялы аб генацыдзе мірных жыхароў Смаргоншчыны ў гады Вялікай Айчыннай вайны, прадастаўленыя пракуратурай Смаргонскага раёна, пазнаёмяць наведвальнікаў са злачынствамі нямецка-фашысцкіх захопнікаў.

Аднаўленне і развіццё народнай гаспадаркі 2-ой паловы XX - пачатку XXI стст.

Адчуць свет прыгожага можна дзякуючы знаёмству з творчасцю нашых землякоў: музыкантаў, мастакоў, скульптараў, пісьменнікаў і паэтаў, народных умельцаў.

Тэатралізаваная экскурсія “Шляхамі кірмашовымі”

Установа культуры “Смаргонскі гісторыка – краязнаўчы музей” запрашае дарослых і дзяцей наведаць тэатралізаваную экскурсію “Шляхамі кірмашовымі”.

Усе жадаючыя адправяцца на Смаргонскі кірмаш, дзе распавядуць аб кірмашовых таварах, аб лялечным тэатры “Батлейка”,  пазнаёмяць з гісторыяй вядомай “Смаргонскай акадэміі”.

Асабліва ўразіць прысутных на кірмашы выступленне  таленавітага смаргонскага мядзведзя. Цікавая гульня дапаможа стварыць цудоўны настрой усім кірмашоўцам.

Тутэйшая гаспадыня – абараначніца распавядзе і пакажа, як традыцыйна выпякалі ў мястэчку абаранкі і з задавальненнем пачастуе імі  ўсіх  гасцей.

Шчыра запрашаем на тэатралізаваную экскурсію “Шляхамі кірмашовымі”!